فرص العمل في المستقبل

الفرص فين في المستقبل؟ أختار مجال دراستي ازاي؟..الكارير وسنينه.

صدمتي الكبيرة

بعد رجوعي من منحة ماليزيا ، وتخرجي من الكلية كطالب مثالي على مستوى الجامعة ، وتقدير كويس ، وخبرة جبارة ” بمعنى كلمة جبارة ” في العمل التطوعي والمدني والتنموي ، كان يُنتظر إني هطلع من هنا والعب ي بيه بالدولارات والاسترليني من هنا ، واقعد أنقي بين كامبردج وأكسفورد وماسوتتش واتنك بقى ، ولكن انتوا عارفين اللي حصل قاعد متفرد بكابتي كأغلب دفعتي والفرص مقفولة ف وشنا بالضبة والمفتاح ، ولو اتفتح باب بنلاقي جيش ولا جيش يأجوج وماجوج بينافسوك عشان يدخلوا منه ، ودا قادني لتساؤلات كثير

تساؤلات كثير..وحيرة أكثر

هل التراك اللي اخترناه لحياتنا غلط ؟ احنا بنسعى وبندور بس هل بندور ف المكان الصح ؟ لو حد لسه في ثانوي وعاوز يختار المجال اللي يدرسه صح وميكررش غلطتنا يختار ازاي؟ ايه الحاجات اللي الواحد يعملها عشان يقبض بالدولارات بجد في المستقبل ؟ البترول دا كان ف الماضي واحنا واضح ان احنا دخلناه ف زمان غلط فيا ترى ف الزمان دا الواحد يدخل ايه ؟ تعالوا نجاوب ع الأسئلة دي في النقط الجاية وركز معايا أوي

1- العالَم بيتجه بسرعة الصاروخ نحو الآلة، نحو حكم الديجيتال في كل حاجة، باتجاه سيطرة الحاسب أكثر وأكثر في كل حاجة، بنسمع طبعا مصطلحات زي الحكومة الإلكترونية، البنوك المميكنة، انترنت الأشياء، السائق الآلي، البنوك الرقمية، ومثال بسيط لكلامي عشان نخش ع النقطة الجاية:
أغلى عملة في العالم ايه؟ الدولار الأمريكي! الدينار الكويتي! معلوماتك قديمة..
أغلى عملة هي عملية رقمية وهي: البيتكوين، في ٢٠١٤ كان ال ١ بيتكوين بأقل من ١ جنيه مصري، ٢٠١٩: ال ١ بتكوين ب ١٣٩ ألف جنيه مصري!!! انتا متخيل ان جنيه ف ايدك ف ٢٠١٤ يتضاعف ١٣٩ ألف ضعف ف خمس سنين.

2- دا يقودنا إن الفرص في العالم الجديد، ورواد المستقبل، وأغنياء القرن الجاي هيكونوا مين؟.. فئتين من البشر..

الفرص هنا..الديجيتال يحكم.

حكم الآلة..

= الناس اللي تعرف تحتوي الآلة دي، وتحكمها، وتأمن سير المعلومات والفلوس والبيانات فيها، ويكون عندهم القدرة يطوروها ويتعاملوا معاها، ويحموا مستقبلا كوكب الأرض من توغل الآلة على البشر. ودا جانب في غالبه معرفي معلوماتي.

= الناس اللي تعرف تعمل حاجات من صميم طبيعة البشر، واستحالة الآلة تعملها، يمتلكون مهارة التحليل، قراءة البيانات والاستنتاج، توظيف المعلومات لصالح البزنس، استشراف المستقبل وتوقعه، التأثير في جموع الناس والشخصية القيادية الإلهامية، الخطابة والكتابة بأنواعها. ودا جانب في غالبه مهاري.

ازاي نكون من أهل الفرص دي ؟

3- إن كنت تطمح أن تكون من أهل الفئة الأولى، فعليك بالبرمجة وما تحتويه من دهاليز ومتاهات وكلها متاهات مباركة وهتدخلك صفوة العالم المتحكمين في مستقبل البشرية بلا مبالغة، وحاول بشدة تحط نفسك في تراكات زي ال cypersecurity، Ethical hacking ، AI ، Embeded systems ، وغيره.. الناس دي هي المستقبل يعني السلطة يعني الفلوس يعني القيمة الاجتماعية يعني كثير..والحتة دي محتاجة نوع من الشخصية شديد التركيز، انطوائي نوعا ما، قادر ع المثابرة، مستعد يذاكر كثيييييييييييييييييييير ويسهر ع الأكواد كود ورا كود.

4- إن كنت تطمح أن تكون من أهل الفئة الثانية، فعليك بال business skills، وبدرجة تليها ال language skills ، ادرس marketing strategies ، market analysis ، businesses management ،business development ، supply chain ، فيه business developer في شركة سعودية “مش عالمية ولا حاجة” بياخد راتب ٤٦٨ ألف دولار ودا طبيعي.
المجال دا باختصار انك بتخلي الشركات تقرر تحط فلوسها فين وتركز استمثاراتها في ايه وامتى، وايه القرار اللي تاخده وكل دا بمليارات.
بجانب كده مهارات زي ال seo، والتسويق بالمحتوى، وال professionals translation ،.. الخ
ولو في مصطلح مش عارفه خده حطه ف جوجل وعيش.

العمر مجرد رقم..

5- أيا كان عمرك وانتا بتقرأ البوست فانتا لازم يكون ليك تواجد بأي شكل في فئة من الفئتين دول حتى لو نسبي مش أساسي
فلو انتا ف ثانوي :انتا ف السن المثالي انك تلحق تنجي نفسك من الدوامة اللي بنتحط فيها ادرس لحد ما تخش كلية، وخلص كلية وبعد كده اشتغل، ولما تخلص كلية وتتفاجئ انك ملط تتعلم من تاني عشان تشتغل.
أيا كان تخصصك – بإستثناء جزئي للمجال الطبي – ابدأ اتعلم حاجة من دول وخش ف التراك وجرب واشتغل وانتا ف الكلية وطور نفسك، متقضيش ال ٤ او ال ٥ سنين بتحشي دماغك بحاجات عفى عليها الزمن وترميها اول ما تتخرج.

لو انتا زي حالاتي فاتك القطر، اشتغل ف الحاجة اللي انتا عارفها ايا كانت وازرع نفسك سيكا سيكا حبة حبة في فئة من الفئتين دول، والعمر مجرد رقم، وسهل تعوض اللي فاتك، وتبقى رقم مش سهل.

6- وآخر حاجة : فين الكليات اللي بتعلم الكلام ده، فين الأماكن اللي بتدي الكورسات دي: بصوا Google مخلاش ووقت ما تقرر تدرس حاجة هتلاقي الف من يدلك وكأمثلة نفتح بيها شوية طرق: مبادرة مليون مبرمج عربي، ومنحة وزارة الاتصالات ITI.. وفيه غيرهم كثير.

لينكات هتفيدك:
منحة وزارة الاتصالات
منحة NTL
منحة AAL
مبادرة FWD

اللينكات اللي فوق مبادرات مجانية لدراسة البرمجة وعلم البيانات والداتا وكل القصة الجميلة دي، وحقيقي المبادرات دي عظيمة جدا جدا وبيتصرف عليك فيها فوق ال 40 أو ال 50 ألف جنيه، وبتطلع مؤهل بشكل كبير جدا لسوق العمل فمتتضيعهاش من إيدك أرجوك.

فصل القول ومسك الختام

الفرص كثيير جدا بس احنا اللي بندور ف الحتة الغلط، اللهم بلغت اللهم فاشهد.
ودمتم..

Sharing is caring!

2 Comments

  1. […] أهم الفرص والوظائف الجديدة في المستقبل، وبناء على كده،… […]

  2. من أهم الفرص والوظائف الجديده في المستقبل

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *