علم البيانات …البترول الجديد


البيانات ..البترول الجديد …يستاهل الضجة اللي معمولة عليه ي جدعان .. ” لو وقتك مهم خش ع النقطة الثالثة علطول رغم ان اللي قبلها مهم وسخن وبسمسم”.

مول تارجت يستخدم علم البيانات للوصول إلى عملائه
مول تارجت يستخدم علم البيانات للوصول إلى عملائه

في بيتنا حامل

في أواخر 2018، في ولاية مينيسوتا الأمريكية، كان مول تارجت “كارفور الغلابة في أمريكا  ” بيبعت منشورات دعائية بالبريد لعملاؤه الدائمين، فوصل لأحد البيوت بريد بوسائل متابعة الحمل لبنت ف البيت دا وإعلانات عن أدوية للحوامل والذي منه، واتفاجئ الأب فالمفروض ان مفيش حد من بناته حامل !!!
الأب راح عمل لكارفور الغلابة سبع رجالة في بعض ومشاكل وازاي تعملوا كده وأكيد مبعوت بالغلط وكارفور الغلابة اعتذرلوه وقالوله هنحاول نوصل لكم المرة الجاية الطرد الصح ، وبعد شهر وصل طرد جديد للحج و guess what يطلع ايه ؟ حوامل برضو لكن المرة دي مشتكاش ولا حاجة لأنه عرف مصيبته وعرف إن البنت حامل ودارى على فضيحته!

البيانات تكتشف الغامض والمثير

الأب طلع وقال إن كارفور الغلابة يعرف عن بيتي أكثر ما أعرف أنا عن طريق البيانات ، وفي الحقيقة أي حد هيستخدم البيانات فهو قادر انه يعرف عني أكثر ما أعرف أنا شخصيا عن نفسي ، ويقدر يحددلي على سبيل المثال هتجوز امتى وفين وهخلف مين وهوصل لأم يزيد ازاي ” ودا سبب اهتمامي بالموضوع الحقيقة ” فايه قصة البيانات دي ؟ وازاي الناس دي بتجمعها وازاي بيستفيدوا منها ، وايه قصة المليارات اللي بيكونوها من ورا الكلام دا ، وايه خطورتها ، وازاي الواحد يشتغل بيها ويحط نفسه بالتراك بتاعها ، كما عودناكم تعالوا نتكلم في نقط محددة:

إن لم تدفع ثمن السلعة فأنت السلعة

1- كنت كل ما أفتح جوجل أو فيس بوك أسأل هما بيكسبوا ازاي ؟ هل اشتراك النت بيتوزع على كل المواقع دي ؟ مش منطقية لا ! تي اي داتا جلدة ومش هتدي حد مليم، ولكن في مثل أوروبي بيقول واتطبق بشدة دلوقتي على نطاقات أوسع مما تتخيل: ” إذا لم تدفع تكلفة السلعة فأنت السلعة ” ودا مكسب كل الشركات دي بياناتك ! ، كل هدفهم جمع بياناتك وإجراء شوية عمليات كده عليها هنعرفها في النقط الجاية ، ثم استخدامها بعد ذلك بيعها هي شخصيا أو في الإعلانات أو في المبيعات أو في التطوير أو في الانتخابات أو في الحروب .

ما هي البيانات، وما هو علم البيانات؟

2- البيانات باختصار شديد: أي معلومة مجردة من أي تحليل أو تصنيف أو تبويب ، وعلم البيانات: التعامل مع هذه البيانات وفهمها بشكل دقيق ويرتبط بالتعامل دا العديد من العمليات مثل: الجمع والتبويب والحفظ والتأمين والتحليل والإصدار والنشر والتسويق ، وفي اخر ثلاث سنين زاد الاهتمام بعلم البيانات أضعاف مضاعفة والعالم كله بقى كلب بيانات وبيجري عشان يبقى ليه دور ف الموضوع دا :

الداتا ساينس في جوجل وارتفاع الاهتمام عليها
علم البيانات في جوجل وارتفاع الاهتمام به

طيب ايه سر الاهتمام دا والضجة دي :

= الوفرة الشديدة في البيانات: تخيل 90 % من البيانات التي يحتويها العالم دلوقتي تم تجميعها في اخر سنتين فقط ” 2017 و 2018 ” ، ودا لزيادة الإقبال على الطرق اللي بيتم من خلالها جمع البيانات دي زي مواقع السوشيال ميديا ، وخدمات جوجل ، وأمازون و Airbnb و Tinder وغيرها.


= تحسن وسائل التخزين فعلى المستوى الشخصي بس : زمان كان أعلى هارد ممكن يكون 128 جيجا ويبقى اسمه الهارد الأسطوري دلوقتي في هاردات بتوصل 20 تيرا و 50 تيرا يعني 20 ألف جيجا وانتا طالع يعني 20 مليار بايت 20 مليار وحدة بيانات.


ويتوقع في 2021 توصل عدد البيانات في العالم ل 40 زيتا بايت ” 40 ألف مليار مليار بايت” 40 وقدامها 21 صفر ، للتبسيط أكثر: ويكأن هيكون عندنا في العالم خمس مليارات مكتبة كونغرس ” أكبر مكتبة في العالم هيكون عندنا منها خمس مليارات نسخة”.


= تقنية المستقبل اللي هي IOT “انترنت الأشياء ” هتكون معتمدة اعتماد كلي على علم البيانات وتحليلها” حيث يتوقع في عام 2030 انه هيكون في 40 مليار جهاز حول العالم مربوط بالنت ويعتمدوا في عملهم ع البيانات اللي يتلقوها
مثال: التلاجة هتبقى مربوطة بالنت تفتح لما يوصلها بيانات ان في حد قادم ، تتلج على درجة حرارة معينة لما تقرأ بيانات ان الأكل المحطوط جواها محتاج يتبرد ف الدرجة دي ، خلاص التحكم البشري بحح !
وأكيد كلكم سمعتوا عن ال SMART HOMES ، اهو نفس الفكرة ..

أمثلة وتطبيقات على استخدام البيانات

قبل ما نتكلم عن ازاي الواحد يشتغل في المجال دا ويتسفيد من الترند دا، خلوني أديكم أمثلة ثانية عن التطبيقات اللي بتستخدم فيها البيانات عشان تعرفوا كمية أهميتها وخطورتها وكونها مصدر ثروة هائل مهول :


– من أشهر حوادث استغلال البيانات: شركة كامبردج أناليتكا اشترت بيانات الناخبين الأمريكيين واستغلتها ف الانتخابات الرئاسية الأمريكية وتوجيه الناخبين ، من خلال تحليل بياناتهم عرفت الشركة الناس دي بتدور على ايه ، وعاوزة تسمع ايه ، وايه نقط الأمان ونقط الخوف بالنسبة لهم ، والوقت اللي ناويين ينتخبوا فيه ، والناس اللي ممكن يأثروا فيهم ، والناس اللي ممكن يأثروا عليهم ، واستغلت دا كله عشان تضرب ضربتها!


– شركة مطارات دبي بتحلل بيانات المسافرين من خلال حاجات كثيرة لدرجة انهم بيحللوا حاسة الشم عندهم بحساسات معينة للتأكد من مشاعرهم ، وجودة الوجبات، ونظافة الحمامات ، وغير ذلك.

– بمناسبة ان احنا جبنا سيرة دبي ، فالإمارات من أكثر الدول العربية المدركة لأهمية البيانات وخطورتها ف المستقبل فضخت فيها فلوس رهيبة جدا وأطلقت مثلا مبادرة مليون مبرمج عربي ، واتعاقدت مع شركة ” يقال أنها ف الحقيقة شركة صهيونية ” اسمها التريكس ب 37 مليون يورو في السنة لتحليل البيانات ويتوقع أن تجني هذا الشركة أرباح ع المدى البعيد من 10 ل 15 تريليون دولار !!

أتعلم وأشتغل ازاي في علم البيانات:

أنا شايف الفلوس كثيرة ومتنطورة في كل حتة فين نصيب ممس ؟ أنا هقولك فين نصيب ممس !
الشغل المرتبط بالبيانات كثير جدا جدا ولكن خليني أتكلم على أشهر اتنين وأهم اتنين:


محلل البيانات: ودا مهمته بالأساس مرتبطة بتفسير ما حصل ف الماضي ومحاولة الاستفادة منه فبيركز على جمع البيانات وتحليلها واستخراج التشابهات فيها والتناقضات جواها وتفسير سبب هذه التشابهات والخروج باستنتاجات تفيد المستقبل .
مثلا: متجر من خلال ابليكشن على النت انخفضت مبيعات نسخته على أندرويد ف شهر يناير بنسبة 40 % ، دا يعني ان في مشاكل ظهرت للمستخدمين الاندرويد مع تحليل بيانات أخرى وايجاد علاقات يقدر محلل البيانات يستشكف المشكلة ويحلها.
في برامج ظهرت بتساعد المحلل على شغلها أشهرها طبعا برنامج SAP ، ورواتب هولاء المحللين لست في حاجة أن أذكر أنها بعشرات الالاف !

عالم البيانات: ودا بيركز على التنبؤ المستقبل واختراع خوارزميات وطرق تستنج ايه اللي هيحصل ونتعامل معاه ازاي ، زي الناس اللي بتطور ترشيحات البحث في جوجل ، واقتراحات نيتفلكس ويوتيوب وغيرهم .

و يلزم لأي حد عاوز يشتغل ف البيانات عدة أسلحة ، زاد يكون عونه ف الطريق وأهم هذا الزاد 3 أمور:
= علم الرياضيات والإحصاء : لازم يكون عندك خلفية واسعة جدا بالجبر ، وال Calculus ، والاحصاء والاحتماليات والمعادلات التفاضلية والتكامل.
= أسس التقنية المعلوماتية والكودينج زي لغة ال R والبايثون.
= المجال الذي سيتم تطبيق علوم البيانات فيه ، فلو كانت البيانات دي مثلا هتستخدم في تطوير مصنع كيمائي لازم تكون رجل ذو خلفية كيميائية جامد أوي زيي كده ..

في كورس جميل جدا جدا من إدراك ممكن تبدأ بيه كبداية للطريق انك تكون عالم أو محلل بيانات ، وللتقديم في الكورس اضغط هنا .

وفي مقال على ميدان موضح بالتفصيل طرق دراسة علوم البيانات والجامعات والمراكز اللي بتقدمها وازاي تاخد السكة دي ، اقرأ المقال من هنا.

الثورة الصناعية الرابعة…

فصل القول: ظهور البخار كان الثورة الصناعية الأولى ، وتصنيع الصلب الثورة الصناعية الثانية ، واختراع الانترنت الثورة الصناعية الثالثة ، فعصر البيانات هو الثورة الصناعية الرابعة فاللهم اجعلنا من عبادك الثوار المشاركين في الثورة الصناعية الرابعة.

اقرأ أيضا:

أهم الفرص والوظائف الجديدة في المستقبل، وبناء على كده، ازاي أختار الكارير بتاعي وأتعلم صح؟

Sharing is caring!

2 Comments

  1. موقع جميل جدا

  2. هذا الموقع جميل

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *