إزاي أبدأ في الكتابة على مواقع المحتوى العربي
“وراء كل شخص عظيم، محتوى عظيم!”
ده عنوان كلامنا النهاردة في الإجابة على السؤال المطروح، هنتكلّم عن تفاصيل مهمة في رحلة الكتابة، وهنتناقش في تفاصيل هتفرق معاك وتساعدك جدًا في الرحلة، هنبدأ بنقاش ده، ثم بعد ذلك هننتقل للكلام عن المواقع والمنصات اللي ممكن تكتب عليها، يلا بينا.
الجزء الأول: 8 نصائح لرحلة كتابة ممتعة في مواقع المحتوى :
1- لازم يكون عندك محتوى تقدمه:
قبل ما تفكر هتكتب فين أو إيه المقابل، فكر هتكتب إيه بالظبط، لإن ببساطة مفيش موقع هيقبل بأي مشاركة لمجرد رغبتك أنت الشخصية في الكتابة، والحقيقة إن امتلاكك لمحتوى خاص بيك هو اللي بيخلي عندك مساحة استمرارية دايمًا.
مش بقولك فكر في مواضيع كتير قبل ما تبدأ، لكن على الأقل موضوعك الأول يكون حاجة حلوة تقدر تنطلق بيها.
2- بصمة الكتابة:
لازم تحاول يكون ليك بصمة في الكتابة، سواءً تكتب في حاجة مميزة عن الباقي، أو يبقى أسلوبك أنت هو المميز، عشان فكرة الأسلوب هي اللي هتساعدك تبني لنفسك اسم حقيقي في وسط الناس العظيمة الموجودة حاليًا.
ومهم إنك تحافظ على بصمتك مع الوقت، متحاولش تبقى نسخة من حد تاني، ولا تخلي مكان معين يلغي بصمتك المميزة.
الموضوع ده بالظبط يتلخص في فكرة إنك تصنع brand لنفسك في الكتابة.
3- طبيعة الموقع:
افهم طبيعة الموقع اللي أنت هتشتغل عليه، لإن كل موقع له سياسة وشروط معينة خاصة بيه، من ناحية عدد الكلمات أو شكل الموضوع، وحتى من شكل المقابل اللي ممكن تاخده من الكتابة.
والحاجات دي رغم إنها بسيطة جدًا لكن بتفرق في قبول موضوعك للنشر من عدمه أو لا، واستفادة الناس من الموضوع بعدها وقراءتهم ليه.
خصوصًا إن كل موقع له جمهوره وله طبيعة مواضيع تتوافق معاه، وده بتفهمه من إنك تقرأ الشروط، وتاخد جولة في الكتابات المعروضة في الموقع.
4- متفكرش في المقابل المادي من المرة الأولى:
أغلب الناس بتبدأ الكتابة في مقالات “الرأي”، وغالبًا مفيش مواقع بتمنح مقابل مادي على النوع ده من المقالات، لكن الفكرة إن مقالات الرأي هي الانطلاقة الحقيقية ليك، وبتفتحلك طريق للكتابة.
ولذلك سؤال: هي الكتابة بتجيب فلوس؟ سؤال شبيه بالفخ، أو التعامل مع الموضوع على إنه هيبقى مربح من المرة الأولى هو تعامل غير سليم، لإنه بيحطك في خانة تقييم الكتابة بالمقابل المادي بس، وده مش صحيح أبدًا.
5- ابني سيرة ذاتية لنفسك:
وده الأهم من التفكير في المقابل المادي، إنك تشتغل على محتوى معين تقدر تتعرف بيه، ومستقبلًا ده اللي ممكن يخلي المواقع تفكر في إنها تستعين بيك بمقابل مادي، لإن صاحب الموقع مش بيدور على شخص بيعرف يكتب بس، لأ بيدور على شخص بيعرف يكتب وعنده إضافة ممكن يقدمها للموقع.
وبالتالي دايمًا قيم كتابتك في إطار إن كانت بتضيف لسيرتك الذاتية حاجة أو لا، وعشان كده نقطة رقم 3 و4 هيفيدوك في تحقيق ده.
6- حدد غرضك من الكتابة في المواقع:
زي ما قولت مش دايمًا التركيز على المقابل المادي، ممكن يبقى التركيز إنك تبني سيرة ذاتية بوجودك في المكان ده، وممكن يبقى الغرض إنك تعمل علاقات كويسة مع أصحاب المواقع دي لحاجة تنفعك مستقبلًا، وممكن يبقى الغرض إنك توصل لمتابعين لكتاباتك على المواقع.
لما تشتغل على الموضوع بالشكل ده، هتلاقيه فرق معاك كتير جدًا.
7- الموضوع محتاج وقت:
بلاش تتعامل مع الكتابة على إنها حاجة سريعة، هتدخل المجال ده وتكسب منه لحظيًا، باختلاف أشكال المكسب على فكرة، لأ ده الموضوع بيحتاج وقت منك وصبر كبير، وكل ما يكون المنتج بتاعك كويس، كل ما فرصتك بتكون أفضل.
ونصيحتي لأي حد في البداية بتكون إنه محتاج يجرّب نفسه في أكتر من مجال، عشان يقدر يحدد بالظبط هو كويس في إيه. ولو عنده إجابة السؤال ده من البداية، يبقى يركز على إنه يجرّب الكتابة في مجاله بأكتر من شكل وفي أكتر من موضوع، ده اللي بيخلق عنده خبرة قوية.
8- التطوير الذاتي:
طوّر من نفسك طول الوقت، بلاش تبقى حابب تتواجد في أماكن كتيرة بشكل عشوائي ومش منظم، وتسيب ده يجي على حساب تطويرك لنفسك، لإن التطوير ده هو اللي بيعلي مستواك تدريجيًا.
التطوير عمومًا أشهر طريقة له: اكتب كتير، واقرأ كتير. لذلك اربط دايمًا بين كتاباتك عشان تقدر تطوّر من نفسك مع الوقت. عشان كده مش ضد إنك تكتب في أماكن كتيرة، لكن زي ما قولتلك بلاش العشوائية.
لو حابب قبل ما تبدأ تقرأ حاجة تساعدك في الرحلة، ممكن تقرأ سلسلة “دليل الكتابة” من على موقع إضاءات: https://bit.ly/37WpA1w
ـــــــــــــــــــــــــــــــــــــــــــــــــــــــــــــــــــــــــــــــــــــ
الجزء التاني: المواقع والمنصات.
حاولت قدر الإمكان أجتهد في بحث المواقع، وإني أوصل لمواقع تقدر تفيدك فعلًا، ودول 15 موقع، اخترتهم بناءً على قوتهم وكمان مساحة النشر الواسعة عليهم، بمعنى قبولهم لنشر محتوى في أغلب المجالات.
فيه مواقع تاني أعرفها لكن مفيش حاجة عن المساهمات الخارجية أو معنديش أي معرفة بيهم، جرّب تكتب في سيرش جوجل كلمة “اكتب معنا” هيظهرلك برضو مجموعة مختلفة من المواقع الأخرى، وبالتأكيد فيه مواقع تانية معرفهاش من الأساس.
ممكن كمان تتابع صفحة: Journalism Jobs – وظائف صحفية
بينزل عليها فرص ممتازة خاصة بالكتابة من وقت للتاني
المواقع مقسومة لجزئين، الجزء الأول، مواقع تقدر تتواصل معاهم من خلال الإيميل عشان تبعتلهم مشاركاتك، والجزء التاني، مواقع تقدر تعمل عليها عضوية وتضيف مقالاتك بنفسك.
الجزء الأول: 10 منصات تراسلها على الإيميل
1- مدونات أراجيك – Arageek Blogs: أراجيك من أكثر المنصات العربية انتشارًا، تقدر تنشر معاهم من خلال المدونات.
تفاصيل النشر: https://bit.ly/2NkEkh8
2- إضاءات – ida2at: من أقوى المواقع العربية في نوعية المحتوى المقدمة عليه.
تفاصيل النشر: https://bit.ly/3dyhDkh
3- عربي بوست: من المواقع اللطيفة في التدوين، وعليها متابعة كبيرة، تقدر تستفيد من مشاركتك معاهم كانتشار لاسمك.
تفاصيل النشر: https://bit.ly/37XhW77
4- NoonPost نون بوست: من المواقع المنتشرة في المحتوى.
تفاصيل النشر: https://bit.ly/37YsdQe
5- قُرْبَة – Qurbah: منصة شبابية منتشرة بقوة خلال الفترة الأخيرة.
تفاصيل النشر: https://bit.ly/3dsnIyN
6- المحطة – elmahatta: الموقع عنده ميزة إضافية وهي إمكانية نشر القصص القصيرة.
تفاصيل النشر: https://bit.ly/2BzwqOk
7- بالعربي: عندهم اهتمام بالمجالات العلمية.
تفاصيل النشر: https://bit.ly/3dCoFVm
8- – شبكة زدني للتعليم: من المواقع المتخصصة في المحتوى التعليمي.
تفاصيل النشر: https://bit.ly/2Z7bLZX
9- Daily Dose of Science – الجرعة اليومية من العلوم: فريق بيشتغل على جميع أنواع العلوم، فرصة جيدة لأي حد حابب ينضم لمجتمع من الكتاب خصوصًا في الصعيد.
تفاصيل النشر: حاليًا الموقع قيد الإصلاح، وقت ما يبدأ شغل من تاني هضيف الرابط إن شاء الله.
10- منشور Manshoor: وضعته في النهاية رغم حبي له، لإنّي مش عارف الموقع بيتلقى مشاركات حاليًا ولا لأ، لكنّه لو شغال فهي تجربة جميلة جدًا.
تفاصيل النشر: https://bit.ly/2AWJehX
*********************************************
الجزء الثاني: 5 من منصات المحتوى التشاركي
يعني بيكون ليك عضوية على الموقع، بتقدر تدخل من خلالها، وتضيف مقالاتك بنفسك عليها للنشر.
1- Sasa Post ساسة بوست: من المواقع المميزة في مجال المحتوى، ويُفضل تخصص ليها جزء من كتابتك في الرحلة، لإن وجودك عليها بيقوي سيرتك الذاتية.
دليل التحرير: https://bit.ly/37YIK6L
2- المنصة: موقع مختلف في فكرته، محتاج تستوعبها كويس قبل ما تضيف مقالاتك، والموقع بعد فترة معينة من الوقت بيقيّم المشاركات الموجودة عليه كلها، وممكن يتم دفع مقابل مادي لبعض الكتّاب عن مقالاتهم، بناءً على معايير الجودة والتميز في كتابتها (ده كان حاصل معايا في 2017، معرفش الموضوع مستمر ولا لأ).
من المهم قراءة المحتوى هنا: https://bit.ly/37YbZ9X
3- مدونات الجزيرة: إضافة عضويتك أحيانًا بياخد وقت طويل، ولذلك مش بنصح بيه كبداية، لكن في رحلة الكتابة لازم تبقى عامل حساب مدونات الجزيرة في يوم من الأيام، عشان هتلاقيها إضافة ليك جدًا.
4- رقيم: من المواقع المنتشرة جدًا في فكرة التدوين المفتوح، تقدر تعمل عليها عضوية وتنشر أي نوع محتوى، سواءً مقالات أو قصص أو حسب ما تحب، المفروض إن ليهم نظام تقدر من خلاله تكسب فلوس، بس أنا معنديش معرفة بالطريقة، ممكن تفهم أكتر عن الطريقة من هنا: https://bit.ly/2Nu1OAA
5- Jawak: موقع تدوين مفتوح تقدر تضيف عليه مقالاتك، ولما بتحقق 1000 قراءة على المقال بتاخد قصاده ربح، حسب المكتوب في الموقع لإنّي مجربتهوش قبل كده، ممكن تلاقي كل التفاصيل هنا: https://bit.ly/3hVG3HQ
ـــــــــــــــــــــــــــــــــــــــــــــــــــــــــــــــــــــــــــــــــــــ
آخر حاجة عايز أقولها، محدش يقدر يضمنلك إنك هتاخد فلوس في وقت من الأوقات، أو إنك هتستفيد متابعة شخصية، لذلك بلاش تعلّق آمالك على الكتابة إنها تبقى مصدر دخل ليك من أول مرة، الموضوع بيجي مع الوقت غالبًا.
لكن الأساسي دايمًا هو إنك تبقى مبدع ومتميز، ده هيفتحلك طرق كتير في الكتابة، وهو ده الضمان الوحيد الموجود لإنك هتقدر تحقق اللي أنت عايزه.
أي شخص أنت منبهر بيه في مجال الكتابة على الإنترنت حاليًا، بيقدر يوصل لوضعه من خلال الخطوات اللي اتكلمنا عليها.
هذا المحتوى قدم لكم بأقلام المبدع: معاذ يوسف.